愛情 & 股票 (轉載)

卡門高唱：「愛情，不過是一件普通的玩意，一點也不稀奇！」雖然不稀奇，仍有萬千癡男怨女自投羅網，正如股票魅力不容睇小，吸引萬千股民前仆後繼一樣。愛情同股票睇黎九唔搭八，其實，某d地方好鬼似，唔信，睇落就知。

買藍籌：好似搵一個最夾既人同你一生一世。買左唔需要放，放左買唔番，而且一定後悔。只要有耐性，回報極之可觀。0係楂住隻藍籌期間，你會信心動搖，受外來誘惑，但只要有決心，必成正果。

二三線股：好似拍散拖，風險大好多，亦刺激好多。唔排除有一日修成正果，但機會少之又少，通常甩拖機會較大。

窩輪=一夜情

買窩輪：好似一夜情。買之前，你都已經知道同賭冇乜分別，係會更刺激、更好玩，但亦要預輸清光，十個有九個都發夢付出少但回報高，但十個有九個都會係輸。

入場費：買大隻好股一般都有最低入場費，好似匯豐（005）咁，最少都要5萬幾蚊。追好既女仔都有一定入場費─ ─樣唔衰、人唔窮、有耐性、有心計，同埋好似匯豐咁，你唔買，大把人買。

差價：股票報價中，有買入（Bid）同賣出（Ask）兩個價，即係投資者願意買入、同賣出既價格 。男女關係當中，我地可以理解為男人願意付出既，同女人願意接受既條件，Bid同Ask相差之價格，我地稱為差價（Spread），依家香港既情況就係Spread越拉越闊，因為差價擴大，成日都冇成交，咁你依家應該明白，點解香港越來越多老姑婆喇。

A股：至於d男士，佢地唔買港股，去晒買A股，因為A股冇將個Ask亂放，只要男人唔將個Bid放得太低，就會有主動沽盤；不過，要注意A股已經升左好多，情況有改變。

逆市買賣：股票市場既大贏家，都係人棄我取既勇者，當人家最瘋狂既時候離開，人人睇淡既時候入市。但愛情就千祈唔好玩人棄我取，應該理解為，當伴侶好失落既時候，你要依舊對佢咁好，一起相伴等黑暗過去，光明來臨；對方極度風光，佢又依舊同你一起──簡單d講，即係可以共富貴，亦可以共患難。