我的游泳班

相信認識我嘅朋友都知道, 本小姐係十分之咁忌水, 即使得一兩粒水花彈上粉臉, 都會嚇到咿嘩鬼叫. 就係2007年嘅5月份, 我, 鼓起無比嘅勇氣, 參加咗公司嘅游泳班. 我對今次嘅訓練班寄予厚望, 下定決心, 一定要堅持到底, 戰勝心魔!!

東京之旅 – 我的戰利品 … 嘩!!

唔講咁多喇, 去片!!!

東京之旅行程篇 - Day 5 to 8

今日要離開箱根, 搭RomanceCar返去新宿. 我之前book咗展望席, 即係車頭位置, 有靚景睇. 上車之前, 係7仔買咗關東煮係車上面食. 食下瞓下睇下風景, 話咁快就返到新宿喇.

第一件事就梗係返酒店放低晒所有行履同戰利品先啦. 跟住我哋又要再出動喇. 下一站係銀座－Gucci Café. 嘩！！個Café好靚呀!! 連啲sales同waiter都又型又靚仔, 仲有幾個摟patpat添. 啲嘢食整得精緻又好味, 價錢唔算好貴, 值得一去再去.

食飽之後又到shopping嘅時間喇, 今次嘅目的地係Garden Walk Outlet. 同Premium Outlet相比, 呢個outlet就比較細, 不過佢哋嘅shops唔同, 所以都係一個值得去嘅outlet. 係呢度, 我就主攻鞋. 日本嘅尖頭high heels出名係又靚又舒服, 直頭可以着住追巴士. 所以, 姊妹們, 仲等咩呀? 盡情掃貨啦!! 手快有, 手慢冇呀!!

掃完貨, 又係飲飲食食嘅時候喇. 去返新宿, 食咗個全蟹宴, 正!!

隨後嗰幾日, 我哋分別去咗築地, 吉祥寺, 下北沢, 代官山, 原宿等等. 最特別係去築地食魚生. 好多人都會去築地魚市場裡面嗰間壽司大, 但實在係太多人喇, 所以, 我哋去咗場外市場一間叫すしざんまい嘅本店. 嘩!! 不得了!! 個燒吞拿魚腩真係冇得頂, 好味嘅指數直頭拍得住神戶牛柳呀!! 食完之後, 真係忍唔住要講50次: 超美味呀!!!

快樂嘅時間過得特別快, 8日7夜嘅日本之旅話咁快就完結喇!! 呢個旅行除咗俾我食到美味嘅OTORO, 買到超抵嘅靚袋靚鞋之外, 留低嘅仲有一張張嘅credit card receipts … 唉!! 見到張statement嘅時候, 就唔慌唔愁喇!! 豪買豪飲豪食嘅背後, 係要付出極為沈重嘅代價架!!

但, 我仍會為出年嘅日本之旅努力儲”冰粒”!! 而漫長嘅”挨柸麵”生活即將展開 …

東京之旅行程篇 - Day 3 & 4 Premium Outlet & 箱根

好興奮呀!! 但, 又有啲驚 … 因為今日就係去Premium Outlet嘅大日子!! 呢個outlet超大, 又多大牌子嘅shop, 除咗常見嘅日本牌子之外, 仲有BV, Coach, Gucci, YSL, SPACE …… 真係”未出發先興奮”. 不過, 我有啲擔心, 我驚...我驚我會失控, 到時洗晒啲錢, 咁就大鑊喇!! 人哋就話洗極都係冰山一角啫, 唉! 我自己知自己事, 得嗰冰粒一小塊, 一見光就溶晒啦!!

係outlet spent 咗一個下晝, 各人都盡興而歸. 一見到正嘢, 我當然係唔會放過獵殺佢嘅機會喇. 結果係點?? 勁囉!! 兩個字: 型, 豪 ... 哼!即管型喇!即管豪喇! 到月尾收到張statement嗰陣就知死, 到時真係喊都無謂 … … 天呀!! 可唔可以賜我一座千年冰山呀!!

同outlet搏鬥完之後, 我哋就要向箱根出發.

離開outlet嘅時候, 已經入夜, 週圍都係漆黑一片, 仲落住雨. 又凍又攰, 最煩嘅係, 要轉好幾次車先可以去到目的地. 有驚無險, 最終都去到要去嘅巴士站, 等到要搭嘅巴士, 原來係最後一班車, 真係好彩, miss咗就大鑊!! 個幾鐘頭, 幾程車之後, 終於去到溫泉酒店!!

我哋會係呢間酒店住兩晚, 住嘅係日式房, 即係瞓地. 放底咗行履之後, 就立即沖涼, 不過唔係去瞓覺, 而係趕住去浸溫泉. 溫泉23:00 close, 我地過咗22:00 先去到, 好趕. 一入到去我哋就衝出去露天溫泉. 因為都幾夜, 溫泉都唔多人, 我哋一人霸咗一個角落, 浸得好開心. 浸完之後, 去朋友仔間房玩咗一陣, 傾下偈, 飲下茶.

第二日一早起身, 食咗個好豐富嘅早餐, 跟住就開始我哋嘅郊遊旅程. 其實, 成日大部份嘅時間都係travelling, 不停咁轉唔同嘅交通工具, 有登山纜車, 吊車, 登山巴士同埋海盜船. 真正停底落o黎, 欣賞風景嘅時間唔多. 雖然係咁, 但整個郊遊旅程都要到差唔多黃昏嘅時候先完結. 返酒店之前, 去咗7仔買我最鍾意嘅關東煮做宵夜. 晚飯係酒店食, 都幾豐富不過就唔算好特別, 不過不失咁啦. 之後, 我哋又去咗浸溫泉, 同噚晚唔同, 我哋去咗另一個場. 不過, 好似噚晚個場靚啲又大啲. 浸完之後, 又去朋友仔間房玩咗一陣, 傾偈飲酒食宵夜.

東京之旅行程篇 - Day 2 橫濱

可能係舟車勞頓嘅關係, 噚晚瞓得好好. 今朝一早check-out, 跟住就落街, 不過唔係冇錢買麵包, 而係睇我最鍾意嘅櫻花!! 櫻花呀櫻花, 你知唔知我掛住你掛咗成年喇, 真係想掛死人咩!! Hotel出面嗰度有個湖仔, 沿路都有櫻花, 好靚!!

下一站係拉麵博物館. 兩句講完: 裝修得意別緻, 但拉麵就唔係特別好食.

醫飽個肚之後就向県立三ツ池公園進發, 根據資料顯示, 嗰度有1600棵櫻花樹 … 係我期待而已久嘅花海呀!! 好可惜, 由於今年日本天氣反常, 去到嘅時候, 櫻花已經過咗盛放期, 啲花都落咗一半. 雖然有啲失望, 之不過, 有機見到啲花瓣隨住風好似雪咁飄散, 都覺得好靚, 好滿足.

希望下一次再去日本嘅時候, 可以見到真正嘅花海啦!!

東京之旅行程篇 - Day 1 香港至東京

晨咁早去到機場check in, 難委哥哥都要陪我冇得瞓, 冇陰公囉!! 之不過, 冇辦法啦, 鬼叫你唔捨得我咩, 去咁多日旅行喎, 仲唔掛死你!! 呵呵!! ^.^

諗住一上機就大覺瞓喇, 點知後面個細路係咁喊, 都瞓唔到, 真係激死!! 都算喇, 好小事, 小朋友係咁架啦! 呆咗4個鐘, 終於可以落機, 又係Immagration嗰度排隊排到傻咗. 好! 都算!! 係咁架啦, 過關實要等, 都好正常啫, 只不過係耐咗啲, 同手腳慢咗啲咁囉. 一出咗閘口, 我哋就去搵counter 買ticket. 跟住就谷鬼氣囉!! 嗰度啲staff都唔知點做嘢嘅, 慢到暈都不只, 仲2個staff serve一個客, 嘩!大佬呀, 後面仲有成村人排緊隊等買ticket, 你當人哋死架!! 就係咁, 我哋目送原本我哋可以搭到嘅嗰班車係個mon上消失, 即係佢已經開走咗… U_U” 而我哋就無啦啦要呆等多成個鐘 … 因為, 一個鐘頭只有一班車去Yokohama!!!

第一站: 橫濱. 由於有special ticket package, 所以係出發之前嗰個星期, 加入咗Yokohama, 我仲book咗一間唔錯嘅酒店 – Yokohama Washington Hotel, 呢間hotel locate o係MM21City, 佢嘅selling point係有riverside view room. 果然冇令我失望, 間房係expect咗咁細, 但個景同internet show嘅一樣, 可以睇到摩天輪同河邊夜景, 真係超靚!!

特務孖寶

特務同事終於都返來喇!!

4月份真係一個放大假嘅好時間呀!! 我同特務同事都不約而同係呢個月放咗個靚假, 開心到暈!! 不過, 呢個月好似同特務同事分開得太耐, 係佢放假嘅時候, 我有啲掛住佢囉 … U_U” …唔知佢會唔會都唔習慣咁多日見唔到我呢?? 嘻嘻!! 係發記已經踏入第十個月喇, 時間唔算好長, 不過我哋已經一齊經歷咗好多風風雨雨, 幾許人士變遷…… 雖然而家仲欠缺少少默契, 但相信假以時日, 我哋必定係一對特務孖寶!!

Long time no see!!

好耐都冇update個blog喇. 各位鄉親父老, 叔伯兄弟, 姊姊妹妹, 係咪好掛住我呢!!

完成o左8日7夜o既日本之旅, 實在係太盡興喇!! 攰到死之餘重要千金散盡 ..... 雖然使極都面o個"浸", 冰山一角... (哈哈!! 我都想 ... ^__^ ) 但, 睇o黎我都要俾心機努力工作, 賺多d錢錢, 出年再戰日本!! 今次除o左去東京之外, 仲有去 Yokohama - MM21 City 同埋 Hakone 浸溫泉. 最開心就係可以去到outlet買平o野.

遲o下, 等我upload D 相, 同大家share一下小妹o既戰利品同日本o既美食啦!!